Alle krystgekte yn 'e lift
De krystdagen binne gelokkich wer foarby. It wie de waarmste kryst yn hast 40 jier. Mar it kwik fan 'e termometer is net it ienichste wat mei de feestdagen yn 'e lift sitten hat.
De nuddels fan 'e krystbeam lizze hjir en dêr noch as in tekken op it laminaat. Mennich gourmetstel stjonkt noch in bytsje nei fan it oansette bargefleis. Lege wynflessen op it oanrjocht en in ôfgryslike wâlm fan bedoarn fretten komt dy yn 'e mjitte at de kuolkast iepene wurdt. It binne de bekende ferskynselen dy't drekst nei de jierdei fan in bekende bibelske profeet komme. Mar foar guon pakte de kryst oars út dan op foarhân planne wie.
Yn Tilburg hat in famylje op twadde krystdei fêst sitten yn in lift. It trijetal, twa broers en in suster, wienen ûnderweis nei de rest fan 'e famylje foar in krystdiner. De âldste telch fan de trije bloedferwanten woe earst syn nije wurkplak showe oan syn broerke en suster. De keardel wie sa entûsjast, dat it útstapke nei it nije kantoar in út de hân rûne rûnlieding waard. Doe't se ek noch op besite by it âlde kantoar gongen, sloech it needlot ta.
'Efkes gau mei de lift om earder oan tafel te sitte', wie it idee. It wie nammentlik kryst en it trijetal moast noch oan de kalkoen. Spitigernôch pakte it plan fan de Brabo's net sa goed út. De lift sei: "Doch it sels mar!" It gefolch wie, 17 oerkes fêst sitte yn in metalen kiste dy't alle foarmen fan tsjinst wegerde. Dick Maas soe hjir hast in twadde film op baseare kinne. De famylje út Tilburg koe neat oars as wachtsje op help, omdat se gjin mobile telefoan by sich hienen en de telefoan yn 'e lift ek stikken wie.
De trije ûngeloksfûgels hawwe in jûn en in nacht harren miich en skyt ynhâlde moatten. Pas op tiisdeitemoarn binne se troch personiel út de lift befrijd. Fan 'e krystkalkoen wie ek neat oerbliuwn foar de liftaventuriers. Sy hawwe noch de smoar yn dat se de trep net nommen hawwe.
